「嶽」曲弦歌東華情 @歡樂滿東華2011-12-10
周一嶽 - 忘不了你
[KTV] 周一嶽 - 忘不了你
演出嘉賓：周一嶽 (食物及衞生局局長)
演出樂團：東華三院黃笏南中學管弦樂團
食物及衛生局局長、Queen's College舊生會名譽顧問周一嶽校友，出席"歡樂滿東華2011"節目擔任演出嘉賓，與學生管弦樂團合作，演唱<忘不了你>。
大師級表演 唔做局長可以做歌手 表情&唱歌技巧簡直係藝術! 嶽局長 你係第一個用視感影響我聽覺既人!
一曲紅爆變身巨星黑超男
忘不了你的嶽曲 (明報) 2011-12-12
一如以往，一年一度嘅《歡樂滿東華》前晚亦播足成晚，Emily睇咗一粒鐘已經有啲「吽吽哣哣」，但當食物及衛生局長周一嶽變身Alan Tam、高唱《忘不了你》時，Emily同屋企人即刻起哄。想知點解？大家上網回味吓就知喇，網民睇完佢半走音又甩拍子，就話笑到反肚兼無力，仲話要力推呢首「『嶽』曲」，要推到阿周局長做12月之星喎。
周一嶽向來鍾意表演唱歌，前晚仲有東華三院黃笏南中學管弦樂團伴奏，周局長好陶醉，不時唱到合埋眼，事後佢話自己第一次出咁大嘅場面，陶醉得嚟都好緊張。
周一嶽東華獻唱 技驚網民
網民睇見佢咁落力，尤其是最後一句「我忘不……呀……了你」，就喺高登回敬佢﹕「只要我一息尚存，我忘不了你~~你~~~！」有人仲話似聽技安開演唱會，但就讚啲學生好勁，坐喺後面可以無動於中。不過Emily諗，若周局長想再幫多啲東華，除咗獻唱，批錢畀百年老醫院廣華醫院重建咪仲直接。
曾浩輝柯景騰上身
除了周局長，唔少醫生都鍾意表演唱歌，好似衛生防護中心總監曾浩輝，上個禮拜五就喺衛生署個晚宴自彈自唱《那些年》，雖然都有少少甩拍子，但就贏得唔少記者掌聲同支持，最尾仲換埋皮褸、牛仔褲，拉個女記者，扮《那些年》男女主角放天燈，搞到全場氣氛高漲，大叫「encore」。曾醫生就梗係開心到不得了，仲自爆中途換衫好趕，幾乎趕唔切拉褲鏈。
今期最爆 周一嶽忘不了的「嶽」曲 (東周刊) 2011-12-12
每年《歡樂滿東華》都會有一個唱歌籌款環節，年年都係一班慈善之星霸晒呢個Solo位，好難會令人有驚喜，但今年就爆出咗一個食物及衞生局長周一嶽。
局長周一嶽由東華三院黃笏南中學管弦樂團伴奏高唱〈忘不了你〉，佢未開始唱歌時，啲音樂都叫人幾咁陶醉，但當佢一開腔，就令你成個人醒晒，皆因佢走音甩拍子之餘，仲加入咗朗誦同男高音呢兩個元素，真係令人又驚又喜。
周一嶽的「嶽」曲，即時於網上瘋傳，好多網友都話佢似技安開演唱會，亦有人話佢o既「嶽」曲比神曲更大威力，不過亦有唔少網友就力撐周一嶽很有善心，為咗籌款努力地唱下去，絕對係勇氣可嘉。
食物及衞生局長周一嶽於《歡樂滿東華》獻唱〈忘不了你〉的片段，即時瘋傳網界。
周一嶽高歌〈忘不了你〉時表情肉緊，表現認真。
有網友力撐周一嶽有勇氣去唱，已經是值得欣賞的。有網友笑指於酒樓看這個節目時，所有食客都笑爆嘴。
沒有留言:
張貼留言